Musikkdrama på historisk grunn «Presten Landstad og jomfru Crøger» er Edvard Hoems musikkdramatiske og gripande skildring av forholdet mellom presten, salmediktaren og folkevisesamlaren Magnus Brostrup Landstad (Bjørn Sundquist) og læraren og folkevisesamlaren Olea Crøger (Hæge Manheim). Landstad begynte innsamlingsarbeidet i Kviteseid, der han var sokneprest frå 1831 til 1839, og heldt fram da han kom til grannebygda Seljord der han var prest i åra 1840-48. Men utan Olea Crøgers innsats ville kanskje ikkje Landstads storverk, Norske Folkeviser (1853), blitt til. Fjorårets suksessframsyning blir sett opp på nytt i år, og spelestaden er den same - Seljords tusenårsstad ved Seljord kyrkje, ei steinkyrkje frå ca 1200. På rollelista står også folketonekunstnaren Øyonn Groven Myhren og songkoret/kyrkjelyden med songarar frå Seljord og Kviteseid. Sigvald Tveit har lagt til rette/arrangert musikken, og Vidar Ytre-Arne er musikalsk leiar.